حوار بين مؤيد ومعارض عن التعديلات الدستورية

للأمانة: الإجابات رد من وجهة النظر المؤيده على وجهة النظر المعارضة

مؤيد:: لازم نعرف إن التعديلات دي مؤقتة والمادة 189 اللي بتنص يجتمع الأعضاء غير المعينين لأول مجلسي شعب و شورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة اشهر من انتخابهم و ذلك كله وفقا لأحكام الفقرة الأخيرة من الفقره الاخيره من المادة 189 وده الكلام اللي قاله كثير ممن أثق فيهم من الفقهاء الدستوريين

معارض :: ا

الماده 189 غير ملزمه لان في اخرها قالوا وذلك كله وفقا للفقره الاخيره من الماده 189 والفقره الاخيره بتقول : لكل من رئيس الجمهورية وبعد موافقه مجلس الوزراءولنصف أعضاء مجلسي الشعب والشورى طلب اصدار دستور جديد وتتولى جمعيه تأسيسيه من مائه عضو ينتخبهم أغلبيه أعضاء أعضاء المجلسين من غير المعينين في إجتماع مشترك إعداد مشروع الدستور في موعد غايته سته اشهر من تاريخ تشكيلها ويعرض رئيس الجمهوريه المشروع خلال خمس عشره يوما من اعداده على الشعب لإستفتائه في شأنه ويعمل بالدستور من تاريخ إعلان مواقفه الشعب عليه في الاستفتاء

فإزاي بقه ملزمه ؟؟ والفقره اللي اضيفت بتقول لازم يوافق مجلس الشعب هو احنا ضامنين انهم هيوافقوا؟؟

مؤيد :: المادتين 189 مكرر والفقره بينصوا على كده بإلزام لان الفقره اللي اضيفت بتنظم بس الطريقه اللي بيتم بيها الانتخاب..فلذلك قيل الرجوع ليها..عشان تنظيم العمليه الانتخابيه لا اكثر لكن المادتين مع بعض بيدلوا ع الالزام وده كلام فقهاء دستوريين كتير اوي يفهوا في النصوص الدستوريه عننا

معارض:: طيب ليه مانحطّش الجمعية التأسيسية دلوقتي ونحط دستور جديد؟

مؤيد :: الرد البسيط إن اللجنة لو جت دلوقتي هتبقى لجنة معيّنة من طرف المجلس العسكري واحنا مش عايزين لجنة معينة هي اللي تحط الدستور الجديد إنما لجنة منتخبة

معارض :: طيب ليه ما ننتخبش اللجنة دي دلوقتي؟

مؤيد :: لأن الدستور ده عقد اجتماعي وسلطة المجلس الأعلى للقوات المسلحة سلطة ضرورة (سلطة استثنائية وماينفعش العقد الاجتماعي ده يتحط في ظرف استثنائي إنما لابد يتحط في ظل سلطة مدنية طبيعية لأن علشان الدستور يتحط صح لابد أن تخضع كل مادة للنقاش الشعبي العام وده شئ صعب دلوقتي في ظروف السيولة اللي البلد فيها دلوقتي وبعدين هيبقى حاجة من الاتنين يا إما يتلطع دستور على استعجال بدون مناقشة ويبقى دستور وشرعية فوقية برضه أو يتعمل صح بقى ومادة مادة تخضع للحوار الشعبي العام وده هياخد وقت كتير هيخلّي المجلس الأعلى في السلطة فترة أطول

معارض:: طيب ايه المشكلة إن الجيش يفضل في السلطة فترة أطول؟

مؤيد:: مش شغلة الجيش إنه يبقى جوة البلد يحمي الشوارع ويرازي فينا ونرازي فيه مش شغلته خالص إنه يبقى شرطة وده وضح لينا جدا في طريقة فض الاعتصامات وطريقة التعامل مع مشكلة المقطم ولاظوغلي احنا مش عايزين نخبط في الجيش ونخسره لأن ده معناه إننا ننتقل من إسقاط النظام إلى إسقاط الدولة وده اللي احنا مش عايزينه نهائي

معارض :: طيب دلوقتي في اعتراضات معينة على التعديلات الحالية زي موضوع الجنسية ؟؟

مؤيد :: موضوع الجنسية...دلوقتي احنا بنتكلم عن رئيس الجمهورية أهم منصب في البلد وبالتالي لابد إننا ناخد أكبر قدر من الاحتياطات واحنا بنختاره وبعدين اللي أفهمه إن أمريكا مثلا بتفرض قسَم معيّن على اللي عايز ياخد الجنسية الأمريكية لابد إنه يقسم إن مصالح أمريكا أعلى من مصالح أي جنسية حملها أو سيحملها في المستقبل...ازاي بقى اللي يبقى رئيس يكون أقسم القسم ده؟!! ده غير إنه ممكن يبقى معاه جنسية إسرائيلية أو متزوج من إسرائيلية فكان لابد من اتخاذ الاحتياط اللازم ده وكمان الدستور هيتعير وممكن كل اللي احنا عايزنه يتحط بعد كده

معارض :: احنا عملنا ثورة علشان نسقط الدستور ازاي بقى نتحكم بيه تاني؟

مؤيد :: الدستور القديم سقط بتسلم المجلس الأعلى للقوات المسلحة لأن المجلس الأعلى للقوات المسلحة كسلطة مش موجودة في الدستور أصلا فالدستور سقط خلاص ولما التعديلات دي هتعدي هيبقى الإعلان الدستوري اللي طلّعه المجلس الأعلى + التعديلات هم على بعض كده الدستور الجديد اللي هنمشي بيه لحين وضع الدستور الجديد

معارض :: طيب ما هو إحنا لو عدينا التعديلات دي هنعمل انتخابات برلمانية سريعة وده هيبقى في مصلحة الوطني أو الإخوان؟

مؤيد:: أولا الانتخابات البرلمانية مش هتبقى بسرعة وممكن تبقى في أغسطس وكمان بعد إقرار التعديلات على طول هنعدّل قانون الأحزاب وهيبقى إنشاء الأحزاب بمجرد الإخطار والأحزاب هيبقى عندها فرصة 5 شهور تقريبا تشتغل

وبعدين الوطني كان بيكسب بالتزوير + الإعلام + غياب الإشراف القضائي + غياب مراقبة المجتمع المدني + البلطجة + انضمام المستقلين + بس 30% على أعلى تقدير من القوة التصويتية هي اللي كانت بتروح تصوّت

وكل الحاجات اللي كان بيكسب بيها الوطني دي مش هتبقى موجودة ففرصهم هتقل كتير

طيب بالنسبة للاخوان الكلام ده مش صح الاخوان هينزلوا بنسبه من 35 % الي 40 % يعني زي ما كانوا بينزلوا قبل كده والوضع هيبقى زي ما هو وبالعكس في ظل قانون تكوين الاحزاب هيبقى في احزاب ع الساحه كتيييييييير ,وفي فرص للجميع

معارض :: طيب ليه مانعملش رئاسية وبعد كده برلمانية؟

مؤيد:: علشان ماينفعش إن الرئيس يبقى موجود من غير أجهزة رقابية (مجلس الشعب والشورى) كده كأننا بنهرب من البرلمان اللي فيه ناس منتخبة ونروح نسلّم دقننا لشخص واحد

معارض :: طيب انا سمعت امبارح احد اعضاء لجنه تعديل الدستور بيفول في حالة الموافقة بنعم هناك اشكال دستوري .. وهو اعادة العمل بدستور 71 .. وقال سيادته ان الحل هو اعلان دستوري ببعض مواد الدستور منها المعدلة وفي حالة رفض التعديلات يتم عمل اعلان دستور

عودة دستور 71 الي الحياة .. ينهي شرعية المجلس العسكري

اي انتخابات يجريها المجلس العسكري غير شرعية بعد عودة دستور 71

مؤيد :: اقولك انا بقه الطبيعي بعد اي ثوره بيتعمل اعلان دستوري ..يعني ايه بقه اعلان دستوري..يعني يتعمل 12 او 15 ماده دستور صغير يعني يمشي الامور اللي في البلد وينظم الانتخابات لان الدستور القديم شرعيته بتكون سقطت لكن هنا في مصر ده محصلش....طب ليه؟؟؟ زي ما احنا ما عارفين الجيش في بينهم انشقاقات من جوه ده طبيعي لانهم بشر مش كلهم رأي واحد قلو طلعوا وفالوا اعلان دستوري ده معناه ان الانقلاب كان عسكري وده هيخلي ناس كتير تعترض

لكن الجيش فعلا عامل اعلان دستوري بس مش معلن اعلان ضمني يعني ايه؟؟ يعني اعلان بالمعنى وطبيعه الحال لانهم بالفعل عطلوا الدستور والعمل به اول ما مسكوا وهو اساسا سقط بسقوط النظام بس اللي منعهم انهم لو هملوا اعلان دستوري هيبقى انفلاب عسكري وده هيرجعنا تاني لدوامه دوله عسكريه فالدستور معلق والعمل بالمواد اللي بس بتسير الحيله في البلد والمواد المعدله عشان الانتخابات والباقي معطل اساسا لن يتم العمل به لانه سقط

معارض::طب والناس اللي بتقول ان في ماده من الدستور بتنص لسه ان مده الرئيس 6 سنولت وتجدد

مؤيد :: ما احنا قلنا في اعلان دستوري ضمني يعني كل المواد دي معطله لان الدستور مش فيه مواد بتعارض بعض..دي اجراءات صوريه عشان ندخل دوله مدنيه صح وخلوا بالكم اعلان دستورى يعني مجلس عسكري

تعليق أخير بقى...

تفتكروا د صبحي صالح و طارق البشري والفقهاء الدستوريين اللي معاهم اللي طلعوا بالقرارات دي ..مدرسوش الموضوع كويس وقتلوا الموضوع بحث..لأ دوروا في كل الجوانب وليه ذكرت د صبحي لانه اتسجن واتبهدل واتهان زي غيره كتير من الشرقاء بس برضه فضل ع كلمه الحق..مش هييجي دلوقت وهيضيع دم الشهدا والثوره ابدا اكيد دور كويس قي الثغرات وقتل الموضوع بحث هو وكل اللي معاه

واخيرا تنبيه هاااااااااااااااااام

لو النتيجه كانت لا..

يا إما المجلس الأعلى للقوات المسلحة هيعمل إعلان دستوري وحكم عسكري ونرجع تاني لـ1952 وكده مش هتبقى فتره انتقاليه لأ مش هتبقى فتره انتقاليه ولا حتى محدده بوقت..هينتخبوا واحد منهم يمسك البلد لغايه وهيعلنوا احكام عرفيه لغايه ام يشوفوا الخطوات الجايه وده ممكن يقعد سنه او اتنين او تلات..ونفضل كل ده في حكم عسكري واحكام عرفيه وحظر تجول والبلد يقف حالها أو هيرجّع تاني دستور 1971 وكأن شيئا لم يكن ونرجع لمربع رقم 1 وده كلام ماحدش يتمناه